Из истории русской иерархии XVI века - архимандрит Макарий (Веретенников)

и спаше в прежне кельи святаго владыкы, часто же и в заднюю келью день [Л. 53 об.] и нощь ко владыке вхожаше брежения для. Владыка до преставлениа своего за пол четверты недели от двадесятаго числа месяца декабря до 14-го числа генваря и то (!) изнеможенна в церковь не выходил ни Христово Рождество, ни на Богоявления, ни в прочая дни. От 20-го числа декабря на ребрех же в ту полчетверты недели никакоже не опочиваше, но все сидя беспрестани молитвовал и без сна пребываше, молебник бо бысть верен о благоверном царе Великом князе Иване многолетном здравии и спасении и о его благоверной царице Великой княгини Марии и о их богодарованных чадех царевиче Иване и царевиче Феодоре и о их христолюбивом воинстве и о всем православном християньстве.

Некогда же у владыкы духовнику седяшу пред преставлением и владыка възрев на духовника и рече: яз и о вас Богу молюся.

[Л. 54] Духовник же поклоняется владыке до земля и глаголет: помилуй мя, Господи, твоими молитвами, святый владыко. Святую же дору протопоп и укроп священници всегда после обедни ко владыке в келью приношаша на дискосных блюдех, а хлебець Пречистой во время вкушенья в обеде всегда съвершался, а Пречистым Животворящим Христовым Тайнам перед преставлением дважды причащался. А от нели же и на владычество сел кроме вкушения обеденнаго втораго вкушениа иже есть ужина у владыки не бывала ни на Велик день, опроче пития мернаго по нужи, егда же рознемогся, такоже в обед своими старцы вкупе вкушаше, кроме ж обеда и в немощи не вкушаше опроче пития мернаго за нужу. А от нелиже и пострихся от святыа руки преподобнаго игумена Иосифа и изве[Л. 54 об.]стился в мимошедших и прощение получив не изыде скверное слово изо уст его и до преставления. Прочие же святаго владыкы добродетели: смирение и любовь и милость ко всем паче же к нищим како могу исписати?

Незадолго же время, за пять день до преставления, в вечер глубокый после правила пошли из задние кельи к собе поп и подиаки, духовник же остался един и сиде блиско владыкы, владыка же аки во сне учал одно слово многажда говорити: “Окакей пошол, Акакей пошол”. Духовник же рече владыке: про которого, государь, Окакиа говоришь? Владыка же аки злобяся рече: Акакие владыка Тверский умер. Духовник же рече: дай, Господи, ты государь многолетствовал, яз нищей желаю того, чтобы ты, святый владыка, меня погреб. Владыка же котому слова никакова не рече, токмо Исусову молитву глаголаше ко обра[Л. 53]зу умилно вслух с хлипанием слезныма очима. И потом в другий день вечер после правила також духовник у владыки поостался и владыка учал говорити: в четверг мне служити аже (!) Бог даст. И к тому слова никакова не рече, токмо Исусову молитву, ко образу взирая, вслух глаголаше с хлипанием. Духовник же тому удивися, видячи его в великой немощи, после же преставлениа святаго владыки духовник все речи владычни уразумел, что владыка преставление свое за долго время вперед провидел.

И потом за день до преставлениа своего в понеделник вечере после правила посылает владыке по духовника келейника своего старца Прохора, бяше бо духовник после правила отошел в келью свою. Келейник же, пришед к духовнику, поведает: владыка зовет. Духовник же скоро прииде [Л. 55 об.] ко владыке и поклоняется ко образом с молитвою и у владыкы благословляется. Владыка же повеле сести духовнику подле себя на конике от дверей и паки владыка глаголет о кануне на исход души чтобы не оплативался. Духовник же глаголет: помню святый владыка твой наказ аже (!) Бог даст.

И нача духовник владыкы спрашивать: государь святый владыка, каково у тобя на серце и что твоя болезнь? Владыка рече: не ведаю, а болезни яз не чую никоторыя в себе от нелиже ты прислал канун преподобнаго игумена Иосифа и яз по вся дни его говорю и молитвами преподобнаго игумена Иосифа с тех мест не чюю в себе никакия болезни. И вопрошаже владыка: колко тому, как канун ко мне прислал еси? Духовник рече: полчетверта году. Владыка же начал благодарити старца Фатея, ученика великаго [Л. 56] старца Касиана Босова, что подвигнулся на таковое великое дело, составити канун и всю Службу преподобному игумену Иосифу. Да и то владыке радостно, что составив Фатей и извесно учинил Макарию Митрополиту всея Русии и благословение от Митрополита приял, еже в кельи молитвовати по ней и до праздновании соборнаго изложении.

И потом паки владыка нача глаголати преподобному игумену Иосифу тропарь: Яко постником удобрение и отцем красота млости (!) подателя, разсужению светильника вси вернии съшедшеся въсхвалим кротости учителя и новоявленным еретиком посрамителя премудра Иосифа, рускую звезду, молящася Богови помиловатися душам нашим. Духовник же поклоняется владыке радостными слезами до [Л. 56 об.] земля, глаголя: Велми, святый владыко, утешился есми слышати таковую похвалу преподобному Иосифу изо уст святых твоих, да и яз слышав жел навыкнути. Владыка же рече к духовнику: ты же прислал. Духовник же рече: прости, святый владыко, дерзнул есми прислати по твоему святительскому повелению и благословению. Владыка же рече: яз тоби на том челом бию. И пакы владыка нача глаголати преподобному игумену Иосифу кондак: Жития треволнения и мятежа мирьскаго и страстная взыграниа ни во что же вменив, пустынный гражанин показася многым бысть наставник, Иосифе преподобие, иноком събратель и молебник верен. Что те рачитель, моли Христа Бога спастися душам нашим.

И потом владыка почал утешатися пространною беседою про Иосифов [Л. 57] монастырь, голаголяже сице: в Осифове монастыре старцы-пророки, подобен Иосифов монастырь старцам Печерьскаго монастыря, старцем киевьским, иже бысть во оно время при благоверных Великих князех. Духовник же рече: государь святый владыка, пречистою милостию, молитвами преподобнаго игумена Иосифа царскым жалованием есть у чего и с кем в Осифове монастыре жити. Владыка же пакы нача молитвовати и молитве своей внимати, бяше бо владыка навык многие кануны наизусть говорити, да Иосифов канун и стихиры. Велми дивно слышати, что владыка ни станет с кем говорити – все здравым гласом, а не дряхлым и изнемогшим.

Духовник же с келейными старцами неотступно пребываше у владыкы брежения для. Во вторник же в последний [Л. 57 об.] день, в онже преставися святый владыка во время завьтрени, ко владыке прииди Феодоровский архимандрит Ефрем. Зело бо владыка архимандрита Ефрема любил за его добродетелное житие. И видя архимандрит владыку велми изнемогша и молит з духовником и с старцы с келейными, чтоб владыка лег