Путешествие в Россию - Якоб Ульфельдт

Так и во всю Ливонскую землю в нашу отчину не вступатися и не воевати, опричь его городов и дворов и земель и ропаты Ливонской земли, что есмя приятелю своему Фредерику королю в сей грамоте имянно описали.

А что Фредерикова королева земля Эзель и Вика, и в Курской земле бискупа эзелского владение, и которою землею кого пожалует, брата ли своего князя Магнуша, или в тех горо-дех учинит своих наместников, — и мне, великому государю, под братом его князем Магнушем и под его наместники тех земель не воевати.

А что мне, великому государю, Божиею милостию царю всеа Русии, били челом от Фредерика, короля датцкого, послы его Эллер Албор Герденборих гофмистр с товарыщи о дву дворех Колках, что в Герском уезде, да о том договору не учинили, — и мне, великому государю, царю всеа Русии, о тех дворех Колках обослатися с Фредериком королем послы своими, да по той обсылке тому договору учинити, как пригоже.

Также приятелю и суседу нашему Фредерику, королю датцкому и норвейскому и иных, не воевати нашие отчины Великого Новагорода пригородов: города Иванягорода, города Корелы, города Орешка, города Ямы, города Копори с волостми.

А которые наши, Божиею милостию, царевы и великого государя земли порубежные сошлися с Фредериковыми Королевыми землями, з городом Варгавом и с иными месты, ино рубеж ведати на обе стороны по старине: которые земли, и воды, и ухожаи, и ловища, и всякие угодия издавна потягли к нашему государьству землям, — и в те земли, и воды, и в ухожаи, и в ловища, и во всякие угодия тебе, приятелю Фредерику королю, и твоим людем у нас и у наших людей не вступатися и не воевати.

А которые земли, и воды, и ухожаи, и ловища, и всякие угодия издавна потягли х королевству Дацкого землям, и в те земли, и в воды, и в ухожаи, и в ловища, и во всякие угодия нам и нашим людем у тебя и у твоих людей не вступатися и не воевати.

А что будет учинилось меж нашими людми наперед сего до сего нашего докончания, наезды, и войнами и татбами и розбои, того всего не искати, ни поминати на обе стороны, по се наше докончание.

А вперед что учинитца меж моими царевыми и великого князя людми с Фредериковыми Королевыми людми, каково дело в сей нашей любви, тому всему суд и исправа без перевода.

А блюсти тебе наших людей и управа им давати с своими людми во всяких делех в своих землях и твоим наместником и всем твоим приказщиком, как и своим людем, по вашему обычаю, в правду, без хитрости.

А нам блюсти твоих людей и управа им давати с своими людми во всяких делех в своих землях и нашим наместником и всем нашим приказщиком, как и своим людем, по нашему обычею, в правду, без хитрости.

А знати исцу исца по своей исправе, а порубу в том не бы-ти на обе стороны.

А случитца твоему Фредерикову королеву человеку в нашей земле по суду да казни смертныя, ино его не казнити, а держати его на крепости, а о том обошлютца наши приказные люди с твоими людми, да обослався, по суду и вершат. Также случитца моему цареву и великого князя человеку в твоей, приятеля нашего, Фредериков королеве земле по суду до казни смертные, ино его не казнити, а держати его на крепости, а о том обослатися твоим, приятеля нашего, приказным людем с нашими приказными людми, да обослався, по суду и вершити.

А послом моим и гонцом царевым и великого князя по твоим Фредериковым Королевым землям и во все поморские государьства землею и водою путь чист безо всяких зацепок. Также и твоим Фредериковым послом и гонцом по моим царевым и великого князя землям землею и водою путь чист безо всяких зацепок.

А гостем нашим царевым и великого князя и купцом Великого Новагорода, и псковичем, и всех городов Московские земли, также и немцем мое вотчины Ливонские земли городов и иным всяким нашим делным людем ездити водою и землею в королевство Датцкое, в город в Копонгов и во все городы в королевство Датцкое ездити поволно, и торговати и меняти всякими товары без вывета, кому ж самому с самими с королевства Датцкого людми и з заморскими людми доброволно во всякой поволности, безо всякого насилования: а меклирем и веркопером на обе стороны отнюдь у них не быти.

А пошлины и мыта платити, как где обычай в которой земле. А которые наши царевы и великого князя купцы и гости, русь и немцы, поедут из Копонгова в заморские государьства с товаром, или которые заморских государьств купцы пойдут мимо королевство Датцкое морскими вороты, проливом Зунтом, и приятелю и суседу моему Фредерику королю наших царевых и великого князя гостей и купцов и вотчины нашие Ливонские земли немец с товары мимо свое государьство в иные в заморские государьства пропущати, и назад им по тому ж поволность давати и задержания им никоторого не чинити.

А которые из иных заморских государьств купцы и всякие торговые люди и мастеровые с товары пойдут в наши царевы и великого князя государьства в московские городы, или в ливонские наши городы, и тех людей всех с товары пропущати без задержания.

А которые гости и купцы Дацкого королевства с товары похотят ехати в нашу цареву и великого князя вотчину, в городы Великий Новгород и во Псков и в Ругодив и во все в московские городы, и в ливонские земли и городы, и им во все городы нашего государьства ездити и торговати воля, и торговати им всякими товары без вывета.

Также которые люди пойдут из за моря дохторы, или мастеровые какие ни есть, на наше имя, — и тебе, приятелю нашему Фредерику королю, тех людей к нам пропущати не задержав, без всяких зацепок.

Также которых наших царевых и великого князя людей занесет ветром, неволею, по морю в королевстве Датцкое, и тех людей животов сыскивати в правду, без хитрости; а которая пошлина с тех людей доведетца имати, и с тех людей пошлина имати,